Lottólimra

Vá! Þú færð vinninga stóra,
ef valdirðu 24.
Og 6-ið kom þá
síðan 23
„hálfan 42“ og svo 4.

Þrír með allar tölur réttar

Limra

Finnst ykkur furð' að ég gapi,
þá Fylkisson stjórn miss' á skapi.
Hann dólgslega  lét,
og lamd' eins og ket,
löggu - sem górilluapi.

Missti stjórn á skapi sínu

Vísa

Hugarafl fólkið nú færði allt saman
og fylltur var kaffibrúsi.
Allir svo höfðu það gott og gaman,
á „geðveiku kaffihúsi“.

Geðveikt kaffihús hjá Hugarafli

Limra

Þeir tímann fá létt til að líða,
og lostugir detta svo íða'.
Nú hoppa á bak,
og hugs' andartak,
um hið magnaða markmið að ...

     ... fara saman í útreiðatúr og skemmta sér á hestbaki.

Harðir á strippinu

Limra

Nú er ég langþreyttur neytandi,
því Nóatún alltaf er breytandi,
verði á kassa,
það virðist ei passa,
við hilluverð, þetta er þreytandi. 

Limra

Hann Ólafur áleit til bölvunar,
allskonar vandræði tölvunnar,
sem fimm sinnum fraus
og fjandinn varð laus,
sem varð síðan ástæða ölvunar.

Limra

Thor fór í eldhúsið - til að nokk,
tómatasalati að skila kokk.
En kom svo til baka,
frá kokknum með svaka
flottan og spánýan spilastokk.

EHF

Ég mætti nágranna mínum, (þ.e.a.s. manni sem vinnur á næstu hæð við mig,) um daginn og hann spurði mig:
„Er bara verið að vinna á laugardegi?“
„Já,“ svaraði ég.  „Ef eitthvað liggur fyrir sem þarf að klára, þá skiptir ekki máli hvað dagurinn heitir.“
„Það segirðu satt,“ sagði hann. „Og það er þetta EHF sem hangir fyrir aftan fyrirtækjanöfnin, sem gerir þetta að verkum.“
„EHF?“ spurði ég hissa.
„Já, veistu ekki hvað EHF stendur fyrir?“
Ég horfði á hann án þess að svara.
Og hann hélt áfram: „EHF þýðir: Ekkert Helvítis Frí!“

Já, það eru sko orð að sönnu, fyrir einyrkja og aðila í smárekstri... 

Limra

Yfir fréttunum drottnar oft drunginn,
svo dæmalaust alvöruþrunginn.
En er þett' einhver frétt,
jafnvel þó það sé rétt,
að pilturinn raki á sér punginn?

Daglegur rakstur

Nóatún svindlar á neytendum

Um daginn vantaði mig m.a. dós af grænum baunum og gulrótum. Ég fór í Nóatún í Hamraborg og sá einmitt það sem mig vantaði. Bonduelle-dósirnar með áðurnefndu innihaldi voru meira að segja með 20% afslætti á kassa, en þær voru verðmerktar á 139,- kr. 20% afsláttur, frábært! Ég tók meira að segja tvær dósir, aðra til að geyma til seinni tíma.

En þá varð mér litið á næstu hillu fyrir ofan. Þar voru nákvæmlega eins dósir, sama innihald, sami framleiðandi, en engin afsláttarmiði. En þar kostuðu dósirnar 129,- kr. skv. hillumerkingu.
Með öðrum orðum, þá eru dósirnar hækkaðar upp um 10 krónur, til að geta gefið meiri afslátt og blekkja fólk. Þetta er svo siðlaust hjá forsvarsmönnum Nóatúns að það hálfa væri nóg!

Fyrir nokkrum árum sá ég í sömu verslun, verðmerkingu á bökuðum baunum frá Heinz. Dósin kostaði 29,- krónur, en svo var líka hægt að kaupa fjórar í pakkningu, undir slagorðinu: Sparaðu! Pakkningin kostaði aftur á móti 120,- krónur, fjórum krónum meira en að kaupa fjórar dósir í lausu. Svona eru neytendur plataðir endalaust. Það er líka öruggara að fylgjast vel með því að verðmerkingar á hillu séu ekki lægri en kassaverðið. Allt of oft kemur fyrir að muni á þessu tvennu, hæsti munur sem ég man eftir á einstakri vörku, er kattasandur sem var verðmerktur 450,- kr. í hillu, en átti svo að svína upp í 995,- á kassanum. Ég sagði nei takk og fékk leiðréttingu, en get ímyndað mér að fullt af fólki hafi ekki veitt þessu athygli.

Verum á verði í Nóatúni og reyndar alls staðar þar sem við verslum!