Fáránlegt að kalla þetta íþróttafrétt!

Þótt íþróttamaður brjóti af sér og hagi sér eins og glæpamaður, finnst mér fáránlegt að flokka það sem íþróttafrétt. Væri það ekki jafn gáfulegt og ef veðurfræðingur væri stöðvaður fyrir ógætilegan akstur og sagt væri frá því í veðurfréttum?

„Einar E. Einarsson veðurfræðingur var stöðvaður af lögreglu um þrjúleytið í dag, en hann mældist á 144 km hraða á Reykjanesbraut, þar sem ekki má aka hraðar en 90 km á klukkustund ... í suðaustan rigningu og þremur vindstigum. Hitastig, þegar Einar var handtekinn, var um fjórar gráður.“

 Nei, það sem gerist utan íþróttaleikvangs og utan íþróttanna sjálfra, er ekki íþróttafrétt, jafnvel þótt maðurinn sé íþróttamaður! Þetta er bara almenn, erlend frétt – og ekkert annað!

Steven Gerrard handtekinn

Uppskurður með berum höndum á föstudagskvöld

 

Hinn landsfrægi töframaður,  Baldur Brjánsson ætlar að taka upp þráðinn aftur og „skera upp“ með berum höndum, eins og hann gerði fyrir rétt rúmum 30 árum í sjónvarpssal. Fórnarlambið að þessu sinni verður vel þekktur Akureyringur, sem verður ekki ljóstrað upp um fyrr en á morgun.

Við förum norður til Akureyrar á morgun, fimmtudag, og munum lesa upp, árita og e.t.v. sýna einhver töfrabrögð sem hér segir:

Fimmtud. 18. des. Nettó kl. 15:30-17:00

Fimmtud. 18. des. Eymundsson Hafnarstræti kl. 20:30-21:30

Föstud. 19. des. Bónus 15:30-17:30

Föstud. 19. des. Menningarkvöld Hóla á Græna hattinum kl. 21:00 (uppskurður)

Laugard. 20. des. Hagkaup kl. 14:00-15:00

Hrefnulimra Róbertsdóttur

Déskoti dugleg er Hrefna,
á doktorinn ákvað að stefna.
Síðan varði hún vel
og vasklega – tel,
en gráðuna fékk hún ei gefna.

Óskarslimra

Á Oddeyri hitti ég Óskar,
sem á átta dætur, mjög þrjóskar.
Hann elskar paellur
og allskonar gellur,
en mest svona mexíkóskar.

Rúnarslimra

Ég heyrði í haust um 'ann Rúnar,
með hendur svo skakkar og snúnar.
Honum líkar svo vel,
vísur - ég tel,
en aðeins þá eru þær búnar.

Busalimra

Ég frétti að færeyskur busi,
Filippus, kallaður Pusi,
sé ósáttur við,
innvígslusið
og standi nú stúrinn og þusi.

Varað við busavígslum

Dóralimra

Ég heyrði að dóninn hann Dóri,
drengurinn sveri og stóri,
sé óbylgjarn mjög,
um íþróttafög
og krakkana bíti og klóri.

SPENNA - Nýtt áhugavert tímarit

Mig langar að vekja athygli á nýju tímariti. Það heitir SPENNA og er uppfullt af sönnum glæpasögum, þjóðlegum fróðleik, dulrænum frásögnum, gríni og gamansögum, auk vísnaþátts sem Ragnar Ingi Aðalsteinsson, sá frómi hagyrðingur sér um.

Blaðið er allt hið áhugaverðasta og ég hvet alla sem ekki eru búnir að næla sér í eintak að hraða sér út í næstu bókabúð og fá sér SPENNU. Í þessu fyrsta tölublaði sem komið er út, má finna greinarnar:

Bonnie og Clyde - frægasta glæpapar sögunnar
Mueller malar gull
Viðurnefni í Vestmannaeyjum - af Jóni alyfát, Koppamundu o.fl.
Blóðsugan - kjallaraherbergi dauðans
Dávaldurinn í Neskaupstað
Lyfjanotkun Hitlers - úr læknaskýrslum foringjans
Íslenskar gamansögur
Ástkona sölumanns deyr - innblástur í réttarmeinafræðina
Vísnahorn Ragnars Inga
Enginn friður fyrir Peace. 

Ljóskulimra

Ég þekk' eina ljósku, svo laglega,
sem leikur á trommur mjög faglega.
Hún hlær ansi mikið
svo hristist allt spikið
og drekkur víst brennivín daglega.

Kínverja skortir rök

Gilbert Felli, í alþjóðlegu ólympíunefndinni, varði sömuleiðis ákvörðunina og sagði þetta líkt því að íþróttamaður tæki þátt í undirbúningskeppni leikanna en kæmist ekki á leikana sjálfa.

Þarna var alþjóðlega ólympíunefndin að styðja ákvörðun Kínverja að láta líta út sem hin níu ára gamla Lin Miaoke syngi við opnunarathöfnina, þegar hið sanna er að hin sjö ára gamla Yan  Peiyi söng, á meðan hin hreyfði bara varirnar... vita laglaus.

Lítum á þetta frá öðru sjónarhorni. Örn Arnarson er skráður til keppni í 100 metra baksundi. En þar sem baksund er ekki sterkasta grein hans, er einhver annar fenginn til að líta út eins og Örn og keppa í hans nafni í baksundinu. Almenningur er látinn halda að Örn sé að keppa.

Er þetta nú í ólympíuandanum?  Eh... Nei...!!! 

Kínverjar verja ákvörðun